By Pius Nyondo
Pagona nkhwantha apo
Mikayele Maviyambewa Msowoya
Chikaya chake nipalapalapala
Pa Yotamu panena pala
Kula ku Mphompha
Doda lagona apa ili
Libenge kuti lichali kuthuta
Mphanyi ine nkhukhuta,
Nkhumwa na kubezera
Mphanyi ine ntchimwemwe perapera
Nkhuti bakaba banthu aba
Nyengo yila bakati bawerako waka ku Joni
Chiponde Mikayele Maviyambewa Msowoya?
Njani wakalekanga kubamanya?
Makopara bakiza nayo ndundundu
Ndipo tikakondwa nakumwa nabo
Kangala? Chipumu?
Yaye mwana wane tikamwanga tuwemituwemi
Ngati tula ukanigulilapo pa Lunzu
Akumbuka nyengo yila nkhiza ku Bulantayala
Kweni ha! Munyane uyu wagona apa uyu
Wakamba kuponya maso uku na uku
Wakamba kuzgeba na tumaswenga
Nkhumanya cha uko bakanjililanga
Nkhanjimweranga waka ine, mwana wane
Pachoko na pachoko bakamba kulwala
Tuvikhoso, kufumila
Tuvilonda pose na pose
Ulendo ukaba weneuwo
Ni aba bali kujigonela apa
Sono wati panyake yikaba Edzi?
Wamwana Edzi yifumelenge kochi mukaya nga ni muno?
Edzi yili ku boma na
Pa Rumphi pala
Pala pa Kanyika kusika kula
Tikumanya kuti ndiwe dokotala sono
Kweni pala ukukhumba kuti uwelele na umoyo
Nkhani ya Edzi iyi uyileke
Muleke mnganya Mikayele Maviyambewa Msowoya wapumulenge
Wamwana bakufwa bakwenera kupumula!
---This poem was inspired by a true life story.
No comments:
Post a Comment